1990-тӥ арысь 12-тӥ инвожое Калык депутатъёслэн нырысетӥ съездэнызы Россилэн кун суверенитетэз сярысь Декларация кутэмын вал. Та документъя, союз республикаос, ачиз Россия Федерация но солэн субъектъёсыз суверенитет басьтӥзы. Со арысь ик сентябре Удмурт АССР-лэн Вылӥ Кенешез та выллем документ улэ гожтӥськиз. Озьы удмурт калыклэн аслаз республикаез кылдӥз.

Та вакытъёсы удмуртлыкез ӝутон, калыклэсь кылзэ, культуразэ утён но азинтон пумысен республика йӧскалык движенилы кулэяськиз. Озьы 1988-тӥ арысь толшоре дас ньыль удмурт азьветлӥсьёс Удмурт клуб кылдытӥзы. Соос, удмуртлыкез азинтон вылысь, калык пӧлын пайдаё ужъёс нуизы. Берло Удмурт клуб «Общество удмуртской культуры» республика огазеяськонлы пӧрмиз. Вакыт ортчемъя, лэчыт юанъёс шараясько. Соин сэрен, удмуртъёс пӧлын но общественно-политической структура кылдытон пумысен вераськонъёс ӵемгес ӝутӥськыны кутскизы. Нош 1991-тӥ арысь 22-тӥ шуркынмонэ Удмуртъёслэн нырысетӥез Быдэссоюз ӧтчамазы «Удмурт кенеш» ассоциацилэн уставез кутэмын вал.

Барабан но горн шудэм улсын пионеръёслэсь флагзэс пыртӥзы. Витетӥ классъёсты пионере кутонлы сӥзем торжественной линейка кутскиз. 6-8 классъёсмылэн командиръёссы дружиналэн председателезлы рапорт сетӥзы.

Вожатоймы 5-тӥ классысь 38 пиналъёсты ӧтиз. Соос, киязы выль галстукъёссэс кутыса, султӥзы ми азе, кыл сётонзэс вераны дасяськизы. Со куспын пичи муш вуиз, солэн но, пе, пионеръёс сярысь тодэмез потэ. Тямысэтӥ классысь пиналъёс валэктӥзы, кинъёс со пионеръёс, кыӵе луыны кулэ соос.

Вуоно пионеръёсмы умой дышетскыны, эшъёссылы юрттыны, инкуазез утьыны, бадӟымъёсты гажаны кыл сётӥзы.

Дружинаысь азьветлӥсь пионеръёс но 6-7 классъёсысь отличникъёс но ударникъёс пичи эшъёссылы галстук керттӥзы.

Улысь Балтач школаысь пионеръёслэн радазы султэм пиналъёс удмурт эктон возьматӥзы, кырӟазы. Бигиней но Кызылъяр школаосысь пиналъёс но крезьгуро «кузьымъёс» ваиллям. Торжественной линейкамы ӟечкыланъёсын йылпумъяськиз.

    Анжелика Рахимзянова.

Татышлы ёросысь Улысь Балтач школа.

19 шуркынмонэ Башкортостанэ вуылӥз Россия Федерацилэн Президентэз Дмитрий Медведев. Республикаын со бадӟымгес саклык висъяз калыклэсь тазалыксэ утёнлы. Соин герӟаськем югдурен тодматскон понна Д. А. Медведев Г. Г. Куватов нимо республиканской клинической эмъюртэ вуылӥз.

Башкортостанлэн Президентэныз Рустэм Хамитовен пумиськонын Дмитрий Медведев республикаысь эмъюртлы но калыклы эмъюрттэт возьматонлы вылӥ дунъет сётӥз.

- Таӵе бадӟым вош-тӥськонъёсын ӵош амбулаторной но секытэн луэм нылкышноослы юрттэт возьматон но мед азинтӥськысалзы. Сыӵе проектъёс демографической югдурез но тупатыны юрттысалзы.

Куеда ёросысь Бадӟым Гондырь гуртын арлы быдэ «Дӧдьы кыткон» шулдыръяськон ортче. Туэ солы мукет шӧм пыӵаз. Уго 28 шуркынмонэ – та шулдыръяськон радъяськон нуналэ - «Тол вӧсь» йылол ортчиз. Куатьтон-сизьымдон аръёс ӵоже ни ӧз чузъяськы вал татын кезьыт тол куазен Инмарлы вазиськон. Туэ гондыръёс ышем-вунэм йылолэз улӟытыны малпазы.

Тол вӧсе трос куноос люкаськизы. Соос пӧлын луизы Пермьысь калыкен ужанъя ёзэтэн кивалтӥсь А. А. Субботина, та ёзэтысь ик валтӥсь ӧнерчи М. С. Каменских но Пермьысь пӧртэм калыкъёслэн огазеяськонъёсынызы кивалтӥсьёс, Чайковскийысь, Чернушкаысь удмуртъёслэн огазеяськонъёссылэн тӧрооссы Л. Д. Филлипова но В. П. Аристова, С. А. Гизатуллин, Ижевскысь Камсьӧр удмуртъёслэн валтӥсьсы Ф. А. Чибышева, республикаысьтымы удмуртъёслэн НКЦ-зылэн ёзчиез Р. Р. Галямшин но мукетъёс. Та нуналэ соосты трос тунсыкоез витиз. Уго Бадӟым Гондырь гурт поселениысь удмуртъёс куноосты быдэс ёросысьтызы удмуртъёсын тодматыны чаклазы. Соин трос пӧртэм кырӟан гуръёс чузъяськизы, нош ӝӧквыл калык сиён-юонъёсын бусьтыр луиз. Та нуналэ куноос Куеда ёросысь чуваш, башкир-бигер, ӟуч огазеяськонъёсын но тодматскыны быгатӥзы. Бадӟым Гондырьысь шор ёзо школаын соослэн культуразылы, сям-йылолъёссылы сӥзем нимысьтыз сэрегъёс дасямын вал. Татын ик, куноослэсь синъёссэс мальдытыса выллем, радэн-радэн сылӥзы гурт поселенилэн пӧртэм сэрегъёсаз улӥсь кибашлыослэн лэсьтэм-суредам ужъёссы.